stjornu-saevar

Hefur þú áhuga á upplestri eða fræðsluheimsókn?

Wed, 28 Aug 2024 09:24:27 GMT

Upplestrar og fræðsluheimsóknir í skóla

Hefur þú áhuga á upplestri eða fræðsluheimsókn í skóla? Ég er boðinn og búinn að koma og lesa upp úr bókunum mínum eða fræða nemendur á öllum aldri um undur vísindanna. Heimsóknirnar hafa alltaf vakið mikla lukku meðal nemenda og kennara og gengið að óskum.

Verð er samkvæmt taxta Höfundamiðstöðvar Rithöfundasambands Íslands .

Geimfjör með IKEA

Thu, 02 Nov 2023 12:05:37 GMT

Skemmtimennt í IKEA

Sem betur fer eru verkefnin mín æði fjölbreytt. Fékk til að mynda nýverið tækifæri til að vinna með IKEA í kynningu á nýrri línu fyrir börn þar sem þemað er geimurinn . Í því fólst annars vegar að fræða krakka í þrígang í vetrarfríinu um geimvísindi í bland við einfaldar og léttar tilraunir sem auðvelt er að gera heim og hins vegar að halda stutta skemmtimennt fyrir starfsfólk einn morguninn.

Þetta var auðvitað alveg hrikalega skemmtilegt og fékk alveg frábær viðbrögð:

„Við hjá IKEA fengum Sævar Helga til okkar til að fræða bæði starfsfólk og börn sem kíktu til okkar í vetrarfríinu um sólkerfið okkar, stjörnumerkin og fleira skemmtilegt. Eftir fyrirlesturinn frá Sævari vorum við mun fróðari um allt sem snýr að geimnum. Með fróðleiksmolum og skemmtilegum örsögum veitti hann okkur innblástur til að fræðast enn meira og minnti okkur á að horfa reglulega upp til himins í daglegu lífi. Fyrirlesturinn hans Sævars var allt í senn skemmtilegur, fræðandi og hnyttinn. Við þökkum kærlega fyrir okkur!“

Ný bók komin út!

Fri, 27 Oct 2023 17:06:41 GMT

Vísindalæsisbókin Hamfarir komin í verslanir

Ég er að gefa út vísindabók fyrir krakka og ungmenni (ca. 8-13 ára) fyrir jólin sem kallast Hamfarir . Hún er fjórða bókin í flokki sem heitir Vísindalæsi . Hinar eru Sólkerfið , Umhverfið og Úps: Mistök sem breyttu heiminum .

Bækurnar eru allar myndlýstar af hinum framúrskarandi frábæra Elíasi Rúna , sem reyndar fékk viðurkenningu fyrir myndlýsingu sína á Sólkerfinu.

Hamfarir er fróðleikur um nokkra verstu atburði í sögu Jarðar. Hvernig dóu risaeðlurnar út? Hvernig varð tunglið til? Á Jörðinni hafa ótrúlegar hamfarir dunið yfir, svo sem árekstrar, risaeldgos og ofurísaldir sem breyttu gangi lífsins en leiddu á endanum til okkar. Gætu þeir gerst aftur? Fróðleikur fyrir forvitna krakka... og fullorðna

Mig langar að sjálfsögðu að heimsækja skóla, fyrirtæki, bókasöfn eða hvaðeina til að lesa upp úr bókunum Hamfarir og Úps! Þetta er reyndar öðruvísi upplestur, því heimsóknin er miklu fremur fræðsla með einföldum sýnitilraunum og skemmtun sem er ætlað að kveikja ögn meiri áhuga á vísindum.

Sendu mér endilega skeyti ef þú vilt fá öðruvísi upplestur eða skemmtimennt.

Viðburðir framundan

Wed, 25 Oct 2023 10:17:09 GMT

Hvað er á döfinni næstu vikur?

Í aðdragand a jóla er auðvitað nóg að gera í að kynna bækurnar og taka þátt í ýmsum viðburðum. Ég mun uppfæra þessa síðu reglulega þegar nýir viðburðir bætast við.

Október

28. október - kl. 11:00 - Ikea - fræðsla um geiminn og geimferðir
28. október - kl. 13:00 - Bókasafnið í Árborg á Selfossi - upplestur úr og fræðsla efnistök nýju bókarinnar Hamfarir
28. október - kl. 17:00 - Stjörnuverið í Perlunni - Útgáfuhóf Hamfarir
29. október - kl. 13:30 - Jarðhitasýningin í Hellisheiðarvirkjun - Opnunarhátíð Forvitnishornsins
30. október - kl. 20:00 - Byggðasafn Árnesinga - Stjörnuskoðunarganga (ef veður leyfir)

Nóvember

10. nóvember - kl. 11:00 - Bókasafn Dalvíkur
10. nóvember - kl. 17:00 - Eymundsson Akureyri - Hamfarir útgáfuhóf
11. nóvember - kl. 15:00 - Amtsbókasafnið á Akureyri
12. nóvember - kl ? - Grána Bistro Sauðárkróki
18. nóvember - kl. 13:00 - Bókmenntahlaðborð barnanna í bókasafni Mosfellsbæjar
25-26. nóvember - Bókamessa í Hörpu
29. nóvember - Rithöfundakvöld Menningarmiðstöðvar Hornafjarðar

Desember

9. desember - Barnabókafjör í bókaverslun Forlagsins á Fiskislóð

Hafið endilega samband ef þið hafið áhuga á fræðslugleði í aðdraganda jóla. :)

Ungmennaþing Sambands sveitarfélaga á Norðurlandi vestra

Thu, 05 Oct 2023 09:57:13 GMT

Hvað vill ungt fólk á Norðurlandi vestra bæta í sínu nærsamfélagi?

Mér finnst fátt skemmtilegra en að fá að vinna með ungu fólki. Í byrjun október stýrði ég ungmennaþingi fyrir hönd Sambands sveitarfélaga á Norðurlandi vestra sem fram fór á Blönduósi. Þar gafst ungu fólki tækifæri til að láta rödd sína heyrast því afraksturinn var kynntur fyrir sveitarstjórnarfólki á svæðinu.

Á þeim brann ótrúlega margt sem þau vilja gera til að bæta nærsamfélag sitt, sérstaklega í umhverfismálum. Svo sem með því að bæta göngu- og hjólastíga, fjölga ruslatunnum, fjölga ferðamátum, ýta undir orkuskipti og margt fleira.

Frétt um þingið á vef SSNV

Loftsteinar og vígahnettir á Vísindavöku Rannís 2023

Mon, 02 Oct 2023 11:01:04 GMT

Tvær skemmtimenntir á Vísindavöku

Vísindavaka Rannís er alltaf stórskemmtilegur viðburður. Í ár fór vísindaveislan fram í Laugardalshöll og hefur hún aldrei verið stærri.

Í fyrirlestrasal var boðið upp á fróðleik um allt milli himins og jarðar og fékk ég þann heiður að segja í tvígang frá loftsteinum og vígahnöttum fyrir fullum sal áhorfenda á öllum aldri.

Mér sýndist þau nú bara skemmta sér vel yfir þessum fallegu en líka pínu ógnvekjandi fyrirbærum úr geimnum. Að sjálfsögðu fengu gestir svo að handleika loftsteina.

Þetta er kjörin skemmtimennt (infotainment) fyrir skóla, fyrirtæki og stofnanir.

Myndirnar tók Arnaldur Halldórsson.

EVE Fanfest - Gleði með CCP

Thu, 28 Sep 2023 20:36:21 GMT

Undur næturhiminsins og norðurljósaskoðun á EVE Fanfest 2023

CCP bauð mér að halda fyrirlestur um undur næturhiminsins og fara svo í norðurljósaferð með tæplega 60 þátttakendur í EVE Fanfest. Alveg ótrúlega skemmtilegt! Í erindinu fjallaði ég um eitt og annað sem sjá má með berum augum á næturhimninum. Og sýndi, eins og alltaf, loftsteina sem vöktu mikla lukku. Ljósmyndarinn Arnaldur Halldórsson tók nokkrar myndir.

Heimsókn í bókasafn Hafnarfjarðar

Fri, 01 Sep 2023 11:29:27 GMT

Uppskeruhátið sumarlesturs

Mér finnst alltaf jafn skemmtilegt að heimsækja bókasöfn og kynna bækurnar mínar þar. Annan september var mér boðið að heimsækja bókasafn Hafnarfjarðar til að taka þátt í uppskeruhátíð sumarlesturs og draga út vinninga fyrir fimm lestrarhesta. Las þar úr Úps! og nýju bókinni Hamfarir. Þar lærðum við meðal annars að lóan sem syngur inn vorið er afkomandi risaeðlenna! Það er frekar merkilegt, er það ekki?

Takk fyrir mig Hugrún og co í bókasafni Hafnarfjarðar!

Rafmögnuð flugferð

Tue, 29 Aug 2023 10:07:14 GMT

Þessa dagana erum við að taka upp næstu þáttaröð af Nýjasta tækni og vísindi. Eitt innslagið fjallar um rafvæðingu flugs. Í blíðskaparveðri fékk ég sitja með Matthíasi Sveinbjörnssyni flugmanni og forseta Flugmálafélags Íslands og fljúga með honum á rafmagni yfir Reykjavík. Vélin er ótrúlega hljóðlát og fislétt.

Innslagið verður sýnt í Nýjasta tækni og vísindi á RÚV næsta vetur.

Sólin skoðuð á fjölskyldudegi Verkfræðingafélagsins

Tue, 29 Aug 2023 09:41:26 GMT

Sunnudaginn 27. ágúst tók ég þátt í virkilega vel heppnuðum fjölskyldudegi Verkfræðingafélags Íslands. Þar var ég hluti af hinni frábæru Vísindasmiðju Háskóla Íslands. Þar sem veðrið var frábært og himinninn léttskýjaður tók ég sólarsjónaukann með og sýndi fólki hana. Í sjónaukanum var hægt að sjá sólbletti og sólgos.

Þetta er tilvalin skemmtimennt fyrir börn og fullorðna, svo ef einhver hefur áhuga á slíku, þá er um að gera að hafa samband.